‘Baga, biga, boga’, 2021eko Herri Urratserako Xiberoots taldeak sortutako kanta

‘Baga, biga, boga’ izango da aurtengo Herri Urratsen kanta. Xiberoots musika taldeak sortu du eta bideokliparekin aurkeztu du ostiral honetan. Izan ere, «Boga» da aurtengo edizioko leloa; «arraunean bezala, Herri Urrats elkartea, ikastolak eta Seaska, elkarlanari esker aintzina baitoaz», argitu zuten koordinatzaileek ekimena aurkezterakoan.

«Boga egin dezagun denok, denok batera; arraunak indarrez astindu eta, aurrera egitera; haizeak ere badaki bidea, goazen berarekin batera; eramango baitu begiak itxita Herri Urratsera», dio abestiak euskararen aldeko borrokak guztion indarra behar duela argi utziz.

Zuberoan sorturiko Xiberoots reggae taldearena dira kantaren hitza, konposizioa eta musika, eta Andoni Basterretxea Urreistik, aurreko mende bukaerako Delirium Tremens taldeko abeslari eta gitarrajoleak, ere hartu du parte.

Kantaren grabaketa, nahasketa eta masterizazioa Elkar estudioak egin ditu, eta teknikaria Victor Sanchez izan da. Bideoklipa, berriz, Kestu produkzioko Gabriel Courty Villanua eta Julien Riderren lana izan da.

Kantaren bideoklipean Lapurdiko Arraun Taldeak eta Sarako Olhain ikastolako ikasleek hartu dute parte.

ABESTIA

HERRI URRATS – BAGA BIGA BOGA

Zia boga hau iragan eta, goazen hamar kolpe emaitera

Ikasontzea den ikastola, ühain gainetik lau haizetara

Seaskaren ametsen indarra, argian egon dadin euskara

Herri urratsen urt’oroz batea, biziazak hire probintzea

Bizizak hire probintzea, bizizak hire Euskera

Bakoitzak berekoa da, Eta denak geureak dira

Erabil zure Euskera, Euskera gurea da

Üthürritik bai itsasoala, Euskara beti boga doala

Zühaitzetan ere gisala, enborretarik ostoetara

Gelditzen ezin ahala, bakotxak hortan dü bere rola

Segi dezagün orai hola hola, biziko beita ikastola

(berriz)

Baxe Nafarroa, Lapurdi Araba

Bizkaia, Nafarroa, Gipuzkoa ta Xiberoa

Senpereko aintzira, Herri Urrats, denak hor gira !

...Indarrak batea, Herri Urrats, Ikastolaren besta

Boga egin dezagun denok, denok batera

Araunak indar aztindu eta, aurrera egitera

Haizeak ere badaki bidea, goazen berarekin batera

Eramango baitu begiak itxita Herri Urratsera

Boga Boga, mariñela!

Joan behar degu, Senperera!

Baga Biga Boga …(x8)

Baga Biga Boga, Baga biga

Zuka, Xuka Toka Noka Baga biga!