Ezkutuko Tutera bistaraziko du Argia ikastolak

 ‘Ezkutuko Tutera... familian ibiltzeko’ proiektua Tuterako Hirian barna murgiltzen gaituen ibilbide historiko eta arkitektonikoa da, baina  ezohiko ikuspuntu hauek kontuan hartuta: euskal kulturarekin loturik dauden datuak agerian jartzen ditu, eta familian ibiltzeko jolasa du (ginkana) haurrek egin dezaten helduen laguntzaz. Ekimen honen bitartez ospatuko du Argia ikastolak aurten 30. urteurrena.

25.000 eskuorri argitaratuko dira lau hizkuntzatan (euskara, gaztelania, frantsesa eta ingelesa) eta ekainaren amaieratik aurrera, formatu digitalean ere argitaratuko da, eta katalanez ere bai. Formatu digitala eskuragarri izango da, hamalau egun barru, web gune honetan: www.iktlagun.com

Argiako ikastolakideek pentsatutako ideia eta eginiko lana da, eta ikuspegi pedagogikoa, ikastolaren sustapena eta iraunkortasun ekonomikoa lotu nahi dira.

Proiektua aurrera eramateko Arketas eta Tuterako Udalen babesa jaso dute, eta erakunde pribatuen laguntza ere bai. NIE eta EHIren lankidetza du egitasmoak.

Hemendik aurrera Nafarroako Erriberako hiri nagusia hobe ezagutu nahi dugun euskaldunok gure hizkuntzan prestaturiko tresna berezko eta atsegina eskura izango dugu Ezkutuko Tuteraren egitasmoaren bitartez.

[Eskuorria pdf. formatuan beheko estekan]